രഹസ്യം !

ഒരിക്കല്‍ ഒരു മിന്നാമിന്നി
ഒരു പക്ഷിയോട് പറഞ്ഞു
ഞാന്‍ ഒരു രഹസ്യം പറയാം
എന്റെ വാലില്‍ ഒരു തീയുണ്ട്‌
ഒരു തീപ്പൊരിയുണ്ട്
ആ തീപ്പൊരിയില്‍ നിന്നൊരു തരി മതി
ഈ ലോകം കത്തി നശിക്കാന്‍ .

കവി

പിടലിയിലൊരുപിടി പൊടുന്നനെ
പോക്കെറ്റില്‍ രണ്ടു വിരലുകളില്‍
ഒരു ചിരി , തീക്ഷ്ണ ദൈന്യ നിസ്സംഗ പുച്ഛം
ഹൃദയത്തില്‍ ഒരുന്മേഷ ദ്രാവകത്വം
അലസഗമന വിലസ വിഹാര നടനം
നാട്യ ലേശ നിര്‍മലത്വം നിര്‍മുക്തം
സ്വന നിമ്നോന്നതങ്ങളില്‍ ഞെരിയുന്ന വാക്കുകള്‍
ചിലമ്പിച്ച മൌനങ്ങളില്‍ സന്ധ്യ വീണലിഞ്ഞപ്പോള്‍
ഒരു നിമിഷത്തിലപ്രത്യക്ഷാനുഭവം
കവി , കവിത , ജീവിതം
എല്ലാം ഒന്ന് തന്നെ , നീ തന്നെ !

വരയന്‍ കുതിര

വഴിയിലൊരു വരയന്‍ കുതിര ,
ഒരു സംശയം, ഇത് ആഫ്രിക്കയാണോ ?
ഇന്നലെ അടിച്ചത് മൂലവെട്ടി അല്ലെ
ആഫ്രിക്കയും അമേരിക്കയും
എന്തിനു സ്വര്‍ഗം , നരകം
എല്ലാം ഒരു തുടം, ഒരു കവിള്‍ ദൂരത്തില്‍ ,
ഇതാണോ ഗ്ലോബലി സേഷന്‍ ? അതോ വസുദൈവക കുടുംബ ....
ഛെ ! അങ്ങനെ നാവിനു വഴങ്ങാതെ എന്തോ ഒന്നില്ലേ അത്
വിഷയത്തില്‍ നിന്ന് വഴുതാതെ മാഷേ
കുതിര വരയന്‍ കുതിര
ലോക കപ്പ്‌ പേടിച്ചു നാട് വിട്ടതാണോ ?
അതെ ലോക്കല്‍ കഴുതയ്ക്ക് വരയിട്ടതോ
വരയാനും വരയിടാനും തിരക്ക്
ഒരു വിര വിരേചനത്തിന്റെ സുഖം !
വര കണ്ടാല്‍ തിരിച്ചരിയാമത്രേ
ഒരു മനുഷ്യന് ഒരു വിരല്‍ വര
ഒരു കുതിരക്ക് ഒരു പുറം വര
ആയിരം അകം വര അര മനുഷ്യന്
എന്തായാലും സംഭവം ജോറായിട്ടുണ്ട്
മോനെ ബോര്‍ഡ്‌ തൂക്കിക്കോ
ഇന്നത്തെ സ്പെഷ്യല്‍ - സീബ്ര ജിന്‍ ജിന്‍ ഫ്രൈ !